பொதுவாக பிறந்த நாளை கொண்டாடாமல் வெளியூர் கிளம்பிவிடும் ராஜா, இந்த முறை தனது ரசிகர்களின் அன்பு வேண்டுதலுக்காக சென்னையில் பிறந்த நாள் கொண்டாடினார்.
சாலிகிராமத்தில் உள்ள பிரசாத் ஸ்டுடியோவில் இன்று பிற்பகல் கேக் வெட்டி பிறந்த நாளைக் கொண்டாடினார். தயாரிப்பாளர் சங்கத் தலைவர் ராம நாராயணன், பெப்ஸி தலைவர் வி சி குகநாதன் உள்பட ஏராளமான திரையுலகப் பிரபலங்கள் பங்கேற்றனர்.
இளையராஜாவின் மகன் கார்த்திக் ராஜாவும் தனியாக கேக் வரவழைத்திருந்தார். அதையும் வெட்டினார் இளையராஜா.
முதல்வர் - ரஜினி வாழ்த்து!
முன்னதாக தமிழக முதல்வர் கருணாநிதி, சூப்பர் ஸ்டார் ரஜினிகாந்த், மதிமுக பொதுச் செயலாளர் வைகோ, தயாரிப்பாளர் பஞ்சு அருணாச்சலம் உள்ளிட்டோர் அவருக்கு போனில் வாழ்த்து தெரிவித்தனர்.
இளையராஜாவின் பிறந்த நாள் ஸ்பெஷல் இசை நிகழ்ச்சி ஒன்றிற்கு வரும் ஜூன் 5-ம் தேதி அவரது மகள் பவதாரிணி ஏற்பாடு செய்துள்ளார். இதில் தமிழ், இந்தி பிரபல பாடகர்கள் பங்கேற்றுப் பாடுகிறார்கள். இளையராஜாவின் புகழ்பெற்ற நத்திங் பட் விண்ட் ஆல்பத்தை முழுவதுமாக பாடுகிறார்கள் பாடகர்கள்.
